2020 ҫулхи чӳк уйӑхӗн 26-мӗшӗ - Чӑваш тӗррин кунӗ пулса тӑчӗ. Кун пирки Чăваш Республикин Пуҫлăхĕ алă пусса ҫирĕплетнĕ.Чӑваш тӗрри вӑл – пирӗн пуянлӑх, ҫырулӑх, аваллӑх управҫи. «Мӗнле пуян чӑваш тӗрри – унта пин-пин ҫулсен йӗрри…» палӑртать ҫак йӗркесен авторӗ – чӑваш халӑх поэчӗ Ваҫлей Давыдов-Анатри. Чӑннипех те тӗрӗре –аннен ачаш юрри, ака-суха сасси, пин-пин ҫулсен юрри…
Ӗлӗкхи тӗрӗсем пире халӗ те хӑйсен илемӗпе савӑнтараҫҫӗ. Пирӗн халӑх ҫак пуянлӑха паянхи куна ҫити упраса хӑварни мӗнле телей! Чӑваш кил-йышӗнче хӗрачасене 6, 7 ҫултах тӗрлеме вӗрентнӗ.Чӑваш тӗррине тӗпчекенӗ А. А. Трофимов ӑна ҫырулӑхпа танлаштарать. Кӗлӗмкасси тӑрӑхӗнче те ӑста тӗрӗҫӗсем пур. Акӑ 6 класра вӗренекен Валя Волкова хӑйӗн асламӑшӗн ӗҫӗ-хӗлӗпе паллаштарать: «Манӑн асанне Волкова Раиса Григорьевна 1948 ҫулта Кӗлешкасси ялӗнче ҫуралнӑ. 1968 ҫулта Кӗлӗмкасси ялне качча тухать. Нумай ҫул хушши выльӑх фельдшерӗ пулса ӗҫлет. Колхозра дояркӑра вӑй хурать. Ҫав вӑхӑтрах пушӑ вӑхӑт тупса тӗрӗ ӑсталӑхне аталантарнӑ.Асанне хушпу, тухья тума ӑста. Ялти хӗрсем сцена ҫинче тухьяпа илӗртӳллӗн тухса тӑраҫҫӗ, хӗрарӑмсем вӑл тунӑ хушпусемпе тенкисене шӑнкӑртаттарса ташлаҫҫӗ, туй илемне кӳреҫҫӗ. Саппун ҫинчи чӑваш тӗррисем те хитрелӗхӗпе илӗртеҫҫӗ. Асанне мана та тӗрӗ тӗрлеме вӗрентсе пырать.Эпӗ уншӑн питӗ савӑнатӑп». 8-мӗш класра вӗренекен Петрова Александрӑна вара амӑшӗ, Надежда Анатольевна, тӗрӗ ӑсталӑхне вӗрентсе пырать. Александра уйрӑмах сурпан тӗррисемпе кӑткӑсланать. Шкулта «Чӑваш тӗрри» темӑпа проект ӗҫӗ туса хӑйӗн ӑсталӑхӗпе паллаштарчӗ. Малашне те чӑваш тӗррине аталантарма ӗмӗтленет. Ҫапла вара ҫамрӑксен хушшинчен ӑста тӗрӗҫӗсем тухасса шанатпӑр. Пурне те Чӑваш тӗрри кунӗ ячӗпе саламлатпӑр!