Чǎваш чěлхи-тǎван чěлхе,

Эс - чи пахи, эс - чун уççи.

Чǎваш чěлхи- тǎван чěлхе,

пин чěлхерен чи çепěççи.

          Кашни халӑхӑн хӑйӗн тӑван чӗлхи пур. Эпир, чӑвашсем, чӑвашла калаҫатпӑр. Мӗн тери илемлӗн, мӗн тери хӑватлӑн, мӗн тери мӑнаҫлӑн янӑрать пирӗн тӑван чӗлхе.Чӑваш чӗлхи пуррипе чӑваш халӑхӗ пур, мӗншӗн тесен чӗлхе нацие пӗлтерекен паллӑсенчен чи кирли. Чӑваш чӗлхи чӑваш халӑхӗн наци пуянлӑхӗ пулса тӑрать. Чӑваш Республикин Аслӑ Совет Президиумӗн 1992-мӗш ҫулхи ака уйӑхӗн 9-мӗшӗнчи Постановленийӗпе килӗшӳллӗн ака уйӑхӗн 25-мӗшӗнче, чӑваш халӑхне ҫутта кӑлараканӗ, ҫӗнӗ чӑваш ҫырулӑхне йӗркелекенӗ Иван Яковлевич Яковлев ҫуралнӑ кун, эпир Чӑваш чӗлхи кунне уявлатпӑр. Чӑвашсен паллӑ ҫыннисем хушшинче И.Яковлев ячӗ чи паллисенчен пӗри. Тӑван халӑха валли ҫырулӑх хывса хӑварнисӗр пуҫне вӑл уҫнӑ Чӗмпӗрти чӑваш шкулӗ вӗрентӳ, литературӑпа культура, искусство ҫыннисене хатӗрленипе те сӑваплӑ.

     Чӑваш чӗлхи эрнинче кашни вӗренекен тӗрлӗ конкурса, викторинӑна хутшӑнса хӑйсен пултарулӑхне кӑтартма, пӗлӗвне тӗрӗслеме пултарать. Ӗҫсене вара тӗрлӗ ӱсӗмри ачасем валли хатӗрленӗ.

      Ака уйӑхӗн 21-мӗшӗнче  5-11- мӗш класра вӗренекенсем хушшинче «Чăваш сăмахлăхăн тĕнчинче» ҫулҫӳрев -конкурс иртрӗ. «Агонисты» кружока çÿрекенсем ачасене  çак ҫулҫӳревре   «Анаграмма», «Сăмах купи», «Тупмалли юмахсем», «Чăваш çĕрĕ»., «Куçаруçăсем», «Метаграмма» станцисем тăрăх илсе çÿрерĕç. Уйрăмах вӗренекенсене ««Тупмалли юмахсем»» тата «Анаграмма» станцисем килӗрӗҫ. Ачасем пӗр-пӗрне ыйтусем пама пултарчӗҫ, диалог йӗркелерӗҫ, чăваш картти турĕç,  ҫӗнӗ сăмахсемпе усă курса ҫыхăуллă пуплеве аталантарчӗҫ.

10-11 –мĕш класра вĕренекенсем   «Чăвашсен  ваттисен сăмахĕсемпе каларăшсем» тата «Чăваш поэчĕсем тата вĕсен хушма ячĕсем»  онлайн -викторинăна хутшăнса сертификат илме пултарчĕç.