Чăваш чĕлхине вĕрентес, аталантарас тата сыхласа хăварас тесе çитĕнекен ăрăва чăваш йăли-йĕркисемпе, культурипе паллаштарас тесе  шкул çулне çитмен ачасемпе те  нумай ĕç туса ирттереççĕ.

        Ачасем хушшинче «Чăвашсен Аслă патриархĕ Иван Яковлевич Яковлев» ятпа викторина вăйă ирттертĕмĕр. Ку вăййăн тĕллевĕсем — ачасене И.Я.Яковлев кун-çулĕпе, ĕçĕ-хĕлĕпе паллаштарасси, вăл чăваш халăхĕшĕн чăн-чăн улăп пулнине ăнланса илме пулăшасси, ачасен ăславлă шухăшлавне, чĕлхе туйăмне аталантарасси, тимлĕ пулма вĕрентесси. И.Я.Яковлевăн кун-çулне, ĕçĕ-хĕлне пăхса тухрăмăр. Уйрăмах ачасене тĕрлĕ йышши  тупмалли юмахсем килĕшрĕç. Вĕсен тупсăмĕсене хăвăртрах шыраса тупас тесе ачасем тăрăшса ĕçлерĕç. Ушкăнпа ĕçлесе хăйсен тавра-курăмне анлăлатрĕç.  

       Паян та, ака уйăхĕн 26- мĕшĕнче,  шкул çулне çитмен ачасем «Уяв» мероприятине Чăваш Республикин гимне юрланипе  пуçларĕç. Малалла ачасем ашшĕ-амăшĕсене чăваш юрри- сăввипе, ташшипе,  вăййипе савăнтарчĕç. Уйрăмах хăнасене аслă ушкăнри ачасен «Шыв хĕрринче»  ташши кăмăла кайрĕ.  Уява килнисем  «Чее тилĕ»  чăваш халăх юмах инсцинировки килĕшнине тăвăллăн алă çупса çирĕплетрĕç.

     Тǎван чĕлхе – атте-анне чĕлхи. Ашшĕ-амǎшне хисеплекен çын тǎван чĕлхене те хисеплĕ, нихǎçан та, нимĕнпе те улǎштараймĕ. И.Я.Яковлев халалĕсене асра тытса пурǎнас. Чǎваш халǎхĕ пурǎннǎ чухне унǎн чĕлхи те ĕмĕр-ĕмĕр чĕрĕ, тĕрĕс-тĕкел пулě.