Ака уйăхĕн 25-мĕшĕнче  кăçалхи çул Аслă вĕрентекенĕмĕр Иван Яковлевич Яковлев çуралнăранпа 175 çул çитнине уявлатпăр. Çак  юбилее халалласа Кĕлĕмкасси вăтам шкулĕнче  чăваш чĕлхи  эрни пуçланчĕ. Пуçламăш класра вĕренекенсем  Иван Яковлев калавĕсем тăрăх тăрăшса хатĕрленĕ ĕçĕсене кĕçĕн классем умĕнче кăтартрĕç,  куракансене пĕчĕк артистсем хăйсене сцена çинче выляни пурне те килĕшрĕ. «Тилĕ тус», «Кулачă», «Йăлăнтармăш» калаври сăнарсем куç умне уççăн тухса тăчĕç. Кашни калав пурнăçра мĕнле пулмалли çинчен асăрхаттарать. 5-11 классем хăйсен ушкăнĕнче пултарулăхĕпе паллаштарчĕç. Мероприяти пуçламăшĕнче  8-мĕш класс Иван Яковлевич Яковлевăн ачалăхĕпе паллаштарчĕ. Ун хыççăн 5-мĕш класс «Уçăлма тухнă  шăши», (6 кл.) «Мăнукне савăнтарни», Лаша шырани», (7 кл.) «Ĕнепе качака таки», (8 кл.) «Çул çинчи тавлашу», (9 кл.) «Кашкăрпа карчăк», (10 кл.) «Утăра» калав тăрăх йĕркеленĕ ĕçĕсене кăтартрĕç. 11-класс  И. Я. Яколевăн «Лаша шырани» видео ÿкернĕ, хăйне май кăсăклă композици тунă. Иван Яковлевич Яковлев калавĕсем тĕрлĕ чĕр чунсем урлă пурнăçра ыррипе усаллине асăрхама вĕрентеççĕ, ачасене вара пĕр-пĕринпе туслă пулма, йывăрлăхра çĕнтерме  хистеççĕ. Яковлев калавĕсем аслăраххисен айванлăхне асăрхаççĕ. Пĕчĕк калавсем пулсан та пире вĕсем пурнăçра ăса вĕрентеççĕ.